Nov 24, 2008

للرجال فقط





تستيقظ مرمر من نومها و تستعد ليوم جديد رايق و ظريف ، و بعد طقوس الصباح ، تسير مرمر فى أحد شوارع الاسكندريه متجهه الى عملها كموظفة بإحدى الهيئات الحكوميه ، لاحظـَـت أن الصبيه و الشباب و الرجال و المتصابين يتفرجون عليها من غير ما يدارو عيونهم اللى تندب فيها رصاصه ، اتكسفت مرمر و قررت متبصش ف عين حد ولا حتى عسكرى المرور ، لأنه هوه كمان بيبحلق فيها كأنها كائن مريخى ، تستكمل مرمر سيرها
و تحاول رسم الوش الخشب على وجهها الصباحى الرايق الذى يظهرفى صورة ابتسامه ، متلاشيه البص إلا لضرورة عبور الشارع منزوع الإشاره ، و تلاحظ سخط الشباب و الصبيه و ضيقهم لموقفها السلبى منهم ، و هنا تظهر إبداعاتهم فى محاولات عتيده للفت نظر مرمر ، خد عندك بأه اللى يضرب صاحبه على قفاه ، و اللى يهزر بألفاظ لامؤاخزه قبيحه ، و اللى يغنى بصوت عالى زى الحمار ، إعتقادا منهم ان لفت انتباه مرمر سوف يحقق وجودهم فى كوكب الأرض ، و بالتالى بدون انتباه مرمر فهم كائنات نورانيه شفافه لا ترى بالعين المجرده ، تمسكت مرمر بموقفها فى تجاهل الذكور من كافة السلالات و أضافت وش جبس مما زاد زعلهم ، قرر الذكور تكوين حزب يتبنى قضية الذكور الضاله فى الشوارع الضلمه ، و بعد انعقاد العديد من الجلسات المغلقه قرر الذكور إقتحام المعركه مع مرمر ، تماسكت مرمر و استكملت السير مع بعض الإضافات الحديديه على الوش الجبس .. و سابقت خطواتها و تلاحقت انفاسها و تلعثمت تكشيرتها و أصبحت فى مظهر كائن غتيت صلب مستحيل مما أثار عـِـند الذكور اكثر و اكثر فى كسر هذه المرمر ، دخلت مرمر صيدليه قريبه ، لا لأخد دواء يمنع السخف ولكن لتستريح من عناء الطريق اللى عامل زى حمام رجالى ، قرر الصيدلى صاحب السبعه و ستين عام ابو قميص مشجر و قصه على جمب ، قرر ان مرمرتقف فوق الميزان عشان يقول لها شوية ملاحظات عن وزنها و علاقته بطولها و يعرف كام كيلو بالعضم و كام كيلو من غير العضم ، و طبعا ده ف صميم علم الصيدله ، مهو دكتور بأه ،، هوه حد يقدر يقول للدكتور انت بتستهبل ؟؟؟! خرجت مرمر من الصيدليه بعد السخافات الأليفه و السلميه من البيه الدكتورو قررت تركب تاكسى يوصلها لشغلها اللى على بعد عشرين متر من الصيدليه ، التاكسى وقف ف تلات اشارات مدة كل اشاره تلات دقايق كامله متواصلة الكلام حوالين الشعب المصرى و المصريين الحمير الهمج الأغبيا "لكن هوه لأ" مش منهم ، تبرع سائق التاكسى بتقديم النصائح الغاليه من نوعية "انتى زى بنتى لأ لأ زى اختى الصغيره و متمشيش ف الشارع لوحدك تانى ، خدى بأه رقم موبايلى و لما تحبى تروحى اى مشوار كلمينى اوصلك.. اصل الشوارع مش أمان" وصلت مرمر شغلها بعد الرحله الطويله للوصول لمقر عملها دفاعا عن حرية المرأه و ايمانا منها بضرورة عمل المرأه ، توجهت مرمر على الفور لمكتب السيد المدير ..
تحية طيبه ..، و بعد
ارجو من سيادتكم التكرم بقبول استقالتى ، و ذلك نظرا لتدنى مستوى المغازله و افقتارها للكلمات الرقيقه مثل يا جميل ، يا حلو ، يا قمر ، يا عسل ، يا سكر، يابو العيون الدبلى ، و أخيرا و ليس آخرا متبطل تمشى بحنيه لا يقوم زازال ,, كما نما الى علمى ان من خرج من داره اتقل مقداره و ان البنت تخرج من بيت ابوها على بيت جوزها و من بيت جوزها ع القبر عدل لا تروح يمين ولا شمال يا سى المدير .

و تفضلو سيادتكم بقبول فائق الشكر و التقدير ،،

مقدمته لسيادتكم
مرمر

Nov 14, 2008

رحـيـل إيـمـانـى




أدركت "أنا" .... و هنا ينتهى دور "انا" فى الجمله عند توضيح ضمير أدركت ، فهو ضمير المتكلم و هو أنا و ليس ضميرها هى .... و حين يأخذ الضمير اشكالاً كتير فهذا يُعد اتفاق غير مُـعلن و غير مُـدرَك بين بنى البشر حول تعدد الإيمانات ، ، .... "الإيمانات" هنا تائهه حائرة دائرة ثائرة تبحث عن قارب خشبى تستقر به و تظل تناضل و تجاهد فى سبيل البحر و البر و السماء حتى مطلع الفجر ،
أو تبحث عن حله تيفال كبيره مليئة بالماء المخلوط بالبهارات و التوابل فى انتظار المرقه ، و بعد عشرين دقيقه ستينية الثوانى سوف نحصل على الإيمانات المسلوقه مع شوربة الإيمانات المتبله .. هذا الطبق صحى لأنه خالى من اى دهون و متع زائفه .. هذا الطبق مناسب لكافة مرضى الهطل الإجتماعى و التابوهات و الغباء المستفحل اجتماعيا و اسريا .. هذا الطبق مفيد لأنه ليس فقط خالى من الحياه بل يقلل الشعور بها أحيانا .. و هناك وصفات أخرى لتناول "الإيمانات" ..
كم من الجرائم ترتكب بإسمك ايتها الإيمانات ..

احزم أمتعتى --لا لأجعلها ترقص-- بل لأرحل سريعا و بشكل مفاجئ و ضرورى الى سكن آخر "سبحان الصدفه" .. سأرحل لأن
كان من المفترض ان أكتب مبرر لرحيلى فى السطر السابق و لكن لم استطع كتابة المبرر و لذلك تركت السطر مفتوح و لم أضع نقطه او فصله لإعلان نهاية الجمله
اشيائى كثيره و غير ضروريه
مكتب
مكتبه
سرير
كتب الكليه
صور
بعض البتاعات السيوى المصنوعه من الخوص الملون تصلح لجميع الأغراض حتىنفاذ الكميه
صندوقى الخشبى
آلات موسيقيه
بعض العطايا من ست الدار .. أمى ،، مناصفة مع الإبنه المطيعه الوحيده .. أختى

لن أحصل على كمبيوترى اللى كان فاضل له شويه و يطلع له ديل
لن أحصل عليه لأسباب غلاويه جامعه مانعه ضايعه
يود أبى أن يتعلم استخدام شبكة المعلومات العنكبوتيه .. بس ف السن الخطره دى ممكن يمشى ف طريق الضياع .. يعاكس بنات و يتفرج على المواقع الإباحيه .. و ينجس العتبه الطاهره
اللى هيه الكيبورد


نرجع لأدركت أنا

أدركت أنا ان

عفوا .. انا لم ادرك شىء بعد و لن استطيع استكمال البوست الآن ، ربما اعاود حين ادرك
.
لقد وضعت نقطة اعلان انتهاء الجمله فى السطر التالى لأنها مش بتيجى ف مكانها الصحيح
.


Jun 4, 2008

الموروث الشعبى

قديما كان يعتقد الإنسان أن القطط لها عقل و تستخدمه فى ممارسة حياتها الطبيعية و هناك أدلة على ذلك ، و من بصيرة قلبه العامر بالإيمان يعتقد الإنسان العاقل البالغ الراشد ان القرود و هى أكثر الحيوانات ذكاءً أيضا لها عقل واعى و مدرك و مسيطر على الموقف من حوله "مهو قرد بأه" ، و من بديهيات النظرية الفلسفية ان يكون الحمار -على الرغم من حموريته المعهوده و الموروثه من فصيلة انسانية مخلطه على حميرى- لكنه أيضا عاقل ومدرك و صاحب قرار حكيم حين يعود الى الدار بمفرده و بدون خريطه ولا بوصلة و إنما بالعقل
"ياللعجب"
و فى العصور الوسطى ظهرت سلالة أخرى من الإنسان ، نوع مخالف لرأى أصحاب النظرية الحيوانية السابقة ، و يرى هذا الإنسان ان الحيوان يتعامل مع الحياه بفطرته و ليس بعقله و انه طبعا غبى و حمار و اهبل و لا يتمتع بنعمة العقل .. و بعد دراسة الظاهرة و تحليلها تحليلا منطقيا ، اكتشف الإنسان انه بيتعب دماغه على الفاضى
فى العصر الحديث قرر الإنسان ان يتخلى عن عقله و ان يعتمد كل الإعتمام فى فهم و تفسير الظواهر على الموروثات و البديهيات و المسلمات مجهولات المصدر و الهوية .. ثم تخلى عن الرغبة فى فهم الظواهر حيث تعامل معها بغباوه .. أو تركها تستغبى عليه
و من موروثات العصر الحديث ظهرت الحجاب ، و هو زى على شكل قطعة من القماش يغطون بيها شعرهم الأكرت مع مراعاة إظهار الثديين و المؤخرة .. أيضا ظهرت عادة شرب الشاى بعد الأكل قال ايه عشان يهضم .. الى جانب بعض البديهيات الموروثة كانو لما يتخضو يتفو ف عبهم .. و لما الأدان يدن أثناء ما حد بيتكلم يبأه كلامه ده حقيقى و لا جدال فيه .. تميزت سيدات هذا العصر بشهقة التقليه بتاعت الملوخية .. و أخيرا ارتداء اللون الأخضر الزرعى المنيل على اللون الأصفر الكتاكيتى المهبب لهثا وراء مسلمات الموضه .. و دى كانت اخر يديهيات العصر الحديث
!!!!!!!!! فينك يا ديكارت !!!!!!!!!

May 20, 2008

التنوره

دوران التنوره حول راقصها
اضطراراً تدور حول ذاتك
و تتمحور داخلها
و تدور لتثقب الأرض من تحتك
تحيط نفسك بهاله ملونه بكل الألوان المبهجه
يراها الآخرون و لا ترى من الوانها شيئا

Apr 30, 2008

إننا نفعل الأحداث



عيد الخلق او "شمو" كما يطلقون عليه الإخوه الفراعنه تلاميذ مدرسة اللعنة الهرمية للتحنيط و المقابر .. و سمعنى سلام وحدوووووه .

هو نفسه عيد شم النسيم بس بعد شوية تعديلات و تطويرات و تجديدات قام بيها المصريين .. الصعايده منهم و الفلاحين ..

المهم انه يكون يوم الاتنين ، و المهم كمان سعاد حسنى تغنى الدنيا ربيع و الجو بديع عشان حسين فهمى يتفرج على نفسه و يتحسر على شبابه و يقفل على كل المواضيع ، و مهم جدا كمان نفتكر ان يوم الاتنين ده اتولد فيه سيدنا محمد ، و مهم نفتكر ان يوم الاتنين ده بيجى كل اسبوع منذ دشليار سنه .. بشكل منتظم و روتينى و إجبارى ، زى ما الكمبيوتر بتاعك يهنج على حته من أغنيه لعبد الحليم و يفضل يعيدها الاف المرات

تانى تانى تانى ... راجعين للحيره تانى

تانى تانى تانى ... راجعين للحيره تانى

تانى تانى تانى ... راجعين للحيره تانى

تانى تانى تانى ... راجعين للحيره تانى

تانى تانى تانى ... راجعين للحيره تانى

هنا تانى هى نفسها يوم الاتنين اللى بيجى كل اسبوع منذ دشليار سنه ..

بس انت تقدر تفصل الكهربا عن الكمبيوتر عشان يبطل ملل


عيد ميلادى -اللى بيجى كل سنه- هوه كمان جه السنه دى يوم الاتنين ، و منطقى جدا ان اليوم يعدى ميحصلش فيه حاجه غير بعض الاتصالات الهاتفيه الخجلانه -من هبل المناسبه- مع تقدير المتصلين لضرورة ترك بصمتهم على تليفونى كمحاولة إثبات منهم انى لسه عايشه ، مع تقديم الكثير و المثير من التهانى الحاره و الدعوات المره بالعيش طويلا و البقاء على قيد الحياه لمده لا تقل عن مائة عام " من الملل". و يعدى اليوم و وراه كام يوم اتنين ف كام اسبوع الاقينى بقوم بنفس الاتصال الهاتفى السخيف لأحد الاشخاص لأقدم له خالص تهانيا و اشاطره افراحه الغامره بقدرته على تحقيق المستحيل فى الوصول الى هذه السن الخطره .. و يخلص العيد و يجى عشرين عيد بعده بشكل نمطى و متوازى و إجبارى، يتخلل الأعياد أحداث نقوم نحن بفعلها أو بإفتعالها ، كإضراب ، أو الحصول على دراسه ما ، او قراءة ورايه ، او مشاهدة فيلم ، او سفر الى دوله شقيقه او ابنة عم او مرات أب ،، لنشعر ان هناك شىء كبير يحدث و يأتى موعد تناول وجبة العشاء ينفى كل أمل فى قدرتك على تحدى الملل .. ف تقوم زى الشاطر تحضر العشان و تقعد تاكل زى ما بتعمل كل يوم ، و حتى لو حاولت تتحايل على الروتين الإجبارى المنتظم و تتخطى القوانين و تاكل بره ، حتكون بتاكل و انت عارف انك بتتعشا بطريقه مختلفه و حتفضل طول وقت العشا بتفتكر طريقتك الحقيقية فى العشا و تمتعض من فكرة التكرار


حان الآن موعد تناولى وجبة العشا حسب التوقيت المحلى لمدينة السكر



نفعل الأحداث لنشعر ان شىء ما يحدث

و تمر الأحداث و كأن شيء لم يحدث

Mar 16, 2008

ثلاث ثوانى برا الزمن


كانت لحظه برا الزمن اللى سألونى أهلى فيها "هل تقبلين بلال خطيبا لكى ؟" .. كان لازم اجاوب بسرعه و تبان إجابتى كأنى متأكده أوى منها .. و لازم أكون انا اصلا عارفه الإجابه عشان اقولها ..الزمن الإفتراضى للتفكير فى الإجابه هو 3 ثوانى برا الزمن الحقيقى لعقارب الساعة المستمره فى الدوران فى اتجاه واحد بشكل بيسببلى توتر متصاعد .. فى ال3 ثوانى كان عليا انى افكر ف بلال كخطيب من خلال تاريخه و حاضره و مستقبله ، و افكر فيه كشريك حياه من كل الزوايا ، يعنى بخصوص شكل التعامل ، الحنيه، تحمل المسؤوليه ، الإخلاص ، الكرم ، الإهتمام ، المجتمع المحيط ، العلاقه بالأهل ، الصدق ، المرح ، و السؤال الأهم "هل يصلح بلال أب لأبنائى ؟"...


--------------------------------


السلحفة الزرقاء أو ما يطلقون عليها الترام أو الترماى ، هى بالنسبه لى البطء و الرتابه المسببان بالضروره الى النكد و الكآبه ، كما انها تمثل لى الحبس بين قضيبين متوازيين فى اتجاه واحد زى عقارب الساعه ، قضيبين بيودونى لسكة اللى يروح ميرجعش و مفيش اوبشن انى أنزل و أغير خط سيرى لو مليت أو غيرت رأيى و لقيت ان الترام مش الوسيله المناسبه ليا ، أو مثلا حبيت أركب ميكروباص أو تاكسى أو قطر أو طيــــــــاره ، و مع ان الترام مش افضل وسائل المواصلات المتاحه ولا أسرعها ولا اجملها ، و مع ان لونها أزرق بس وافقت أركبها


-------------------------------


عجبنى اوى تشبيه ليلى أنطون للراجل بإنه جمبرايه

Feb 20, 2008

حبيبى الحقيقى


حد حلو لدرجة انى ساعات انسا نفسى و يتهيألى انى بحبه .. حد جابلى هديه ف الفالنتاين .. هديه مكونه من مكالمة تليفون قصيره جدا فيها صوت حنين اوى كأنه بيحضننى و فيها أغنية جنات "بحبك" و فيها رساله رقيقه من شخص رقيق .. الهديه كمان كانت دبدوبه كبيره لونها أحمر بتخبط على باب بيتى و قلبها مكتوب عليه اسمى و إسمه .. الدبدوبه ماسكه ف إيدها ورده حمرا .. كمان جابلى بوكيه ورد أحمر ريحته تجنن و مع الورد كارت عليه اسمى و اسمه .. جوا الظرف بتاع الكارت كان فيه مفتاح عربيه واقفه تحت البيت عليها رسم قلوب حمرا كتير بأحجام مختلفه و بدل نمر العربيه مكتوب اسمى و اسمه .. جوا العربيه كان فيه دعوه على العشا ف مكان حلو بإسمى و إسمه .. ف كاسيت العربيه كان فيه شريط متسجل عليه صوته بيقول بحبك بكل اللغات .. ف المكان الحلو كانت الأرض مفروشه ورد أحمر على شكل قلب حبيبى .. على الترابيزه كان حبيبى عاشق ولهان قاعد مستنى وصولى .. وصلت .. قام استقبلنى بحضن كبير ف الإيدين و بوسه من شفايفه على طرف صوابعى الضغننه .. اموت انا .. و مسك ايدى رفعنى فوق الورد .. فوق الأرض .. و قال لى خطى .. خطيت من فوق قلبه و مادوستش عليه .. طرقع بصوابع ايده اليمين مرتين و عينه ف عينى ، جت صنيه دهب فيها علبه قطيفه حمرا صغيره فيها دبلتين .. عليهم اسمى و اسمه ..عيونه قالتلى انا لك على طول خليك ليا .. لبسنا الدبلتين و رقصنا فوق الأرض ب20 سنتيمتر على مزيكا هاديه .. حطيت راسى على كتفه و غمضت عيونى ..
ترررررررررررررررن

تررررررررررررررررررررن

تررررررررررررررررررررررن
انا : الو
خطيبى : الو ايه يا مرمر انتى نايمه لغاية دلوأتى ؟ ليه ؟؟؟ انا مستنيكى ف الشارع بقالى ساعه و ربع يتفع كده يعنى انا عمرى مائمبنتيمطحىنو نسيمتل ستاهتف هىنظمملاوةئتبنيس با لاهنكس بل هخكش ل هخكثقهصف اهضخجفختعفوةىءؤر \يتبالا\ئء شبنيمتمنتؤر يب

ميبنةى كئءنمتمنتسباعهقاعا يئب ىلاتنزءؤر لاسبيهشحصتنا ب بنتلبلاتن ايئباتصخحشثص سرتمسيب سبايلخدفضت5ا بتلىئى ءر
انا : صباح الخير

Feb 16, 2008

النوم على جنبى اليمين


وش ولد اسمرانى و عيونه جاحظه عمال يطاردنى بقاله كام يوم -الوش مش الولد- و مش عرفه وش مين ده اتاريه وش الولد اللى بيشتغل ف السايبر اللى كنت رحته مره زمان لما كان النت فاصل عندى ،

مشهد من فيلم 55 اسعاف بتاع ميس انشراح لما كانت بتشرح البى التئيله يعنى بلاى و البى الخفيفه يعنى برا ، و بتطلع منها زى العسل ،

ميار البنت اللى بديها درس قانون و ساكنه ف العماره اللى جمبى و ممكن تلغى حصه عشان مش لاقيه البواب يشيل لها القانون ،

حفلة انغام لما كانت لابسه الفستان الأحمر ف مهرجان هلا فبراير ،

الولدين اللى عاكسونى و عملتلهم محضر ف القسم و منها ع النيابه و مصممه أصعد الموضوع للمحكمه ،

خناقه كبيره ع البحر كان فيها تلطيش و شتيمه ،

كواليس فيلم بيت اللى كنت بشارك فيه من ورا الكاميرا و طلع دين أبويا فيه و ف الآخر ميكسبش و تروح الجايزه لفيلم يقرف ، و دى مش مجامله هوه يقرف فعلا ،

الشوارع بعد الماتش ،

الكمبيوتر تئيل و انا عايزه انام

رنه من واحده مش صحبتى .. هوه لسه فى حد بيرن ؟

قسط الموبايل

حلبس ايه بكره

انا مش عرفه انام ليه ؟

هروح البنك امتا عشان اعمل الفيزا دى حتاخد وقت

الدكتور المشرف على رسالتى ف الكليه بيقول ان البلد فيها حكومه و فيها أمان

الوصله اتقطعت و كان فى فيلم حلو انهرده مش حشوفو

اختى بعد ما استلفت منى لبس كتير جدا و طرحات و اكسسوارات على سبيل الهديه الغير مردوده ، رفضت تسلفنى شنطه جينز

قلبى بيدق ليه جامد كده ! انا ضغطى مش مظبوط ؟

الفرقه حيكون مصيرها ايه بعد انشطار بعضها و تكاسل البعض الآخر و انشغال البعض الثالث

انا محتاجه انام

اهلى زعلانين منى عشان بخرج كتير

نسيت الهاند فرى ف الكافيه

انا حنام بأه

هوه انا ممكن مصحاش ؟ و ابقا مت خلاص كده ؟ بتزعجنى فكرة ان حد يغسلنى و يشوف جسمى او حتى يلمسه .. فكرة ان حد يحمينى و انا كبيره كده و كمان فاقده السيطره على نفسى تماما ، ماما حتزعل اوى عليا ، و رانيه ، و بابا ، و مى ، و زوزو ، و رنده ، و احمد ، و محمد ، و صابر ، و ..... عموما كده كفايه ، كل دول بيحبونى و بحبهم

بلال حيعمل ايه لو انا مت انهرده ؟ هيعرف من أهلى ف البيت وللا هيحس بيا ؟.. احنا مرتبطين اوى ، هيزعل عليا اوى ؟ هوحشه ؟ ممكن يحب بعدى بس حيفضل معلق صورتى ف الأوضه جمب صورة مامته ، و اكيد لو جاب محفظه هيحط فيها صورى كلها اللى معاه

تصبحى على خير يا مرمر

Feb 13, 2008

كـــورة تــنــس


كورة تنس بتحاول تنزل البحر ف اسكندريه ف عز الشتا

راحت ناحية الموج الصغير الأبيض اللى على الرمله و بلت رجليها و دألجت نفسها عشان تبل جسمها كله و تاخد درجة حرارة الميه

خافت شويه بس خوفها ممنعهاش

حزروها كتير الموج و الرمله و القطه اللى ع الشط

كلهم حاولو محاولات مستميته لإقصاءها عن فكرة النزول ، اللى يقول حتغرقى ، و اللى يقول حتموتى سأعانه ،

و اللى يقول البحر ملوش كبير

الكوره كانت شخصيتها قويه

نزلت الميه

و عامت على وش الميه و مغرقتش

و طموحها خلاها تتحول لبرتقانايه برتقانية اللون

و بردو بتعوم على وش الميه

طلعت البرتقانايه ع الشط و اصحابها اللى كانو خايفين عليها من الميه باركولها و على التحول

الموج و الرمله و القطه قلعو ساعاتهم و رمو موبايلاتهم و نزلو الميه من غير ما يخافو

ف عز الشتا

بالليل

Jan 27, 2008

الشمس مرمر



تعلن محطة الأرصاد الجويه

الاسكندرانيه

الميه ميه

ان اسكندريه

سوف يسودها الظلام الدامس

و البرد القارص

و العين عليها حارس

و حابس حابس

و ذلك نظرا لحدوث ظاهرة

نادرة الظهور

رائعة الفجور

رملية البحور

هى ظاهره تحدث كل سنه مره

و هى خروج الشمس بره

و حتبأه العيشه مره

من غير الشمس

يعنى

النور

يعنى

الدفا

خروج الشمس مرمر

الى الأراضى السيويه الشقيقه

فى رحله مع 11 صديقه

و فى الحقيقه

انوى الانتقام من الروتين

المتين

بأعضاء التنين

أنوى الإستمتاع

بالبتاع

اللى اسمه سفارى

و لكن حذارى

و أكرر

حذارى

من العكننه

على للمستهدفه

شمس بنت دفا

Jan 23, 2008

يتبعهم المفتعلون





هناك تشابه كبيره بين الإفتعال كهوس عصرى يصيب البشر ، و بين المحاولات الافتعاليه من البعض المتشبهين بالمفتعلين اعتقادا منهم انها موضه فرنسية الصنع واجبة المواكبه .. الإفتعال ظهر فى الآونة الأخيرة فى شكل موجات متلاحقه و معاده سلفا مثل الحديث المطلق عن التفاصيل ،
فتجد من يحكى عن جماليات الرطوبه المسيطره على الحيطه اللى ورا الحمام و التشكليل الناتج من نقاط خضراء تفصل بين فن البوستر السينمائى و بين شقوق اسمنتيه تحجب ورائها كنز متعفن يتمثل فى مواسير الصرف الصحى ، و هناك ربط افتعالى جمالى مقزز بين مواسير الصرف الصحى الغليظه ، و ما تحويه من مخلفات آدمية فكرية مش عضويه لا سمح الله ، و بين واحده ست تخينه من منطقة الأرداف محتاجه تروح لبنان عشان تعمل شفط دهون ، لكن زوجها المفتعل يسهر ليلا شتويا طويلا يتغزل فى سماكة جلد فخذيها المترهلين ، و فى مدى اثارتهما اثناء جلوسها عارية على عرش الكبينيه المؤدى بالضروره إلى مواسير الصرف الصحى ..

و من الكابينيه الى الكنبة الحمراء و مزيج جمالى الافتعال حاد الروعه منزوع الآدميه ، يصدر بالضروره من خلطه خبيثه مكونه من المزاج والقرف معا، من خلال وصف افتعالى لتفاصيل مفتعله تصدر اسبوعيا عن وزارة الافتعال الحمراء تحت شعار رئيس تحريرها صاحب مدرسة "قدسية الممارسات الجنسية المقززه" ، هذا الفأر الجبلى الكامن بداخل شخص مفتعل هو مفتاحه لتجميل رائحة سوائل منوية محرمه و كريهه ، و وصفها بعبق تاريخى مستقر داخل الروح الالهية المتمثلة فى كل مفتعل اثيم


Jan 18, 2008

من روائع الحلمنتيشى




خد قلبى و عمرى خد البؤبؤ

خد خرطة بسبوسه بالبندؤ
خد ربع جنيه دهبه بيبرؤ

و سيب الباسبور

يـعـنـى مـتـسـافـرش


!حتسافر تعمل لى مهرج!

و افرض بأه لو مخك هنج

و للا البنزين ف الهوا تلج

إركب حنطور

بخوفك عشان عمرك ما ركبت طياره

بتقول لى عجوزه و كركوبه

و تخينه و سأعانه ف طوبه

و زنجيه و أهلها م النوبه

بلقب دكتور

دى الست صاحبة الشغل


انا قلبى ازاى يعمل دؤدؤ


و الصَدَفه ازاى من غير لؤلؤ

ستاشر يوم شمسى حتشرؤ

من غير ولا نور


حد ف الدنيا يسافر ستاشر يوم بحالهم كده وش



!!!!!



Jan 1, 2008

الجدل المثار حول قضيب الحمار و شنب الصرصار

التحديث أسفل البوست

ارتفاع موروث و مفاجئ فى أنف الرجل الشرقى أو ما يعرف بذكر الإنسان .. هذا الإرتفاع يسبب طغيان الأنف على مساحة ليست بقليلة من تلافيف المخ .. و هنا تكون الأنف العالية دلاله على الشموخ و العظمه و السيطرة و بهذا يكون عضو المناخير عضو هام جدا فى أعضاء ذكر الإنسان .. و لكن اذا أجرينا مقارنة عادلة بين أنف ذكر الإنسان و زلومة ذكر الفيل أبو زلومه
_مع ان مفيش فيل من غير زلومه_
سيفوز الفيل صاحب أطول و أضخم و أعلى زلومة على قرينه ذكر الإنسان

كما أن انتشار الشعر الكثيف اسفل الأنف العليا و ما يعرف علميا بالشارب أو الشنب ، له الهدف الأسمى فى اتزان الوجه الى اسفل قليلا بعد رفعه الى أعلى بفعل عوامل النرجسية المناخيرية التضخمية
و للمرة الثانية على التوالى يخسر ذكر الإنسان مسابقة أطول شنب حيث فاز بالمركز الأول قرينه الصرصار الحاصل على اللقب دورتين متتاليتين بعد ان كان لقب أطول شارب من نصيب القط توم
يتفوق ذكر الإنسان فى بعض المهارات الأخرى مثل القدرة الجنسية .. و أيضا يفوز عليه الحصان
أما عن حيوان الثور الهايج و المعروف عنه القوة و الجبروت و الغباوه فى الأداء فهو أيضا يتفوق على ذكر الإنسان فى منافسة شريفة للحصول على لقب الأقوى
هذا كان موجز لأهم الأنباء عن كائن شرقى مهووس بالسيطرة الذكورية ، يدعى الذكر ،
و الذى يختلف تماما و كليا و جذريا عن ما يسمى بالرجل

و صرح مصدر مسؤول فوز كائن الرجل بلقب العاقل ، كما تنفى جماعة المرأه المستقلة المحذورة ذكوريا اية مسؤولية جنائية او نسائية عن منح لقب العاقل لكائن الرجل و خاصة الشرقى منه

الى هنا ينتهى الموجز و ما خفى كان ألعن

---------------------------------------------------------
لا ألتمس عذراً لكل من ينعم بعمر زمنى أكبر من عمره العقلى ، حيث يرسل العقل اشاراته لعدساته اللاصقة ان يتخلى عن قراءة جيدة لمقال نقدى موجه للسلاله ينتمى اليها ، خطأ لا يغتفر وقع فيه الكثير من السادة الحضور ، و لمن لا يملك الوقت أو الإهتمام أو فك شفرة اللغة المختفية وراء سطورها ،
اود تسجيل الفرق بين الذكر و الرجل فالذكوره من الصفات الحيوانية أما الرجوله من الصفات الإنسانية ..
و هو نفسه الفرق بين الأنثى و المرأه
توضيح آخر :
لقد ميزنا الله عز و جل عن الحيوانات ببعض من العقل و محله القلب
لذا وجهت سوطى لكل ذكر يتباها بصفاته الذكورية الحيوانية التى وهبه اياها الله و ليس له الفضل فيها
و بحثت دوما عن رجل يملك صفات الرجوله ، لا لأتزوجه بل لأصدق انهم حقيقة.
-
-
-