Nov 24, 2008

للرجال فقط





تستيقظ مرمر من نومها و تستعد ليوم جديد رايق و ظريف ، و بعد طقوس الصباح ، تسير مرمر فى أحد شوارع الاسكندريه متجهه الى عملها كموظفة بإحدى الهيئات الحكوميه ، لاحظـَـت أن الصبيه و الشباب و الرجال و المتصابين يتفرجون عليها من غير ما يدارو عيونهم اللى تندب فيها رصاصه ، اتكسفت مرمر و قررت متبصش ف عين حد ولا حتى عسكرى المرور ، لأنه هوه كمان بيبحلق فيها كأنها كائن مريخى ، تستكمل مرمر سيرها
و تحاول رسم الوش الخشب على وجهها الصباحى الرايق الذى يظهرفى صورة ابتسامه ، متلاشيه البص إلا لضرورة عبور الشارع منزوع الإشاره ، و تلاحظ سخط الشباب و الصبيه و ضيقهم لموقفها السلبى منهم ، و هنا تظهر إبداعاتهم فى محاولات عتيده للفت نظر مرمر ، خد عندك بأه اللى يضرب صاحبه على قفاه ، و اللى يهزر بألفاظ لامؤاخزه قبيحه ، و اللى يغنى بصوت عالى زى الحمار ، إعتقادا منهم ان لفت انتباه مرمر سوف يحقق وجودهم فى كوكب الأرض ، و بالتالى بدون انتباه مرمر فهم كائنات نورانيه شفافه لا ترى بالعين المجرده ، تمسكت مرمر بموقفها فى تجاهل الذكور من كافة السلالات و أضافت وش جبس مما زاد زعلهم ، قرر الذكور تكوين حزب يتبنى قضية الذكور الضاله فى الشوارع الضلمه ، و بعد انعقاد العديد من الجلسات المغلقه قرر الذكور إقتحام المعركه مع مرمر ، تماسكت مرمر و استكملت السير مع بعض الإضافات الحديديه على الوش الجبس .. و سابقت خطواتها و تلاحقت انفاسها و تلعثمت تكشيرتها و أصبحت فى مظهر كائن غتيت صلب مستحيل مما أثار عـِـند الذكور اكثر و اكثر فى كسر هذه المرمر ، دخلت مرمر صيدليه قريبه ، لا لأخد دواء يمنع السخف ولكن لتستريح من عناء الطريق اللى عامل زى حمام رجالى ، قرر الصيدلى صاحب السبعه و ستين عام ابو قميص مشجر و قصه على جمب ، قرر ان مرمرتقف فوق الميزان عشان يقول لها شوية ملاحظات عن وزنها و علاقته بطولها و يعرف كام كيلو بالعضم و كام كيلو من غير العضم ، و طبعا ده ف صميم علم الصيدله ، مهو دكتور بأه ،، هوه حد يقدر يقول للدكتور انت بتستهبل ؟؟؟! خرجت مرمر من الصيدليه بعد السخافات الأليفه و السلميه من البيه الدكتورو قررت تركب تاكسى يوصلها لشغلها اللى على بعد عشرين متر من الصيدليه ، التاكسى وقف ف تلات اشارات مدة كل اشاره تلات دقايق كامله متواصلة الكلام حوالين الشعب المصرى و المصريين الحمير الهمج الأغبيا "لكن هوه لأ" مش منهم ، تبرع سائق التاكسى بتقديم النصائح الغاليه من نوعية "انتى زى بنتى لأ لأ زى اختى الصغيره و متمشيش ف الشارع لوحدك تانى ، خدى بأه رقم موبايلى و لما تحبى تروحى اى مشوار كلمينى اوصلك.. اصل الشوارع مش أمان" وصلت مرمر شغلها بعد الرحله الطويله للوصول لمقر عملها دفاعا عن حرية المرأه و ايمانا منها بضرورة عمل المرأه ، توجهت مرمر على الفور لمكتب السيد المدير ..
تحية طيبه ..، و بعد
ارجو من سيادتكم التكرم بقبول استقالتى ، و ذلك نظرا لتدنى مستوى المغازله و افقتارها للكلمات الرقيقه مثل يا جميل ، يا حلو ، يا قمر ، يا عسل ، يا سكر، يابو العيون الدبلى ، و أخيرا و ليس آخرا متبطل تمشى بحنيه لا يقوم زازال ,, كما نما الى علمى ان من خرج من داره اتقل مقداره و ان البنت تخرج من بيت ابوها على بيت جوزها و من بيت جوزها ع القبر عدل لا تروح يمين ولا شمال يا سى المدير .

و تفضلو سيادتكم بقبول فائق الشكر و التقدير ،،

مقدمته لسيادتكم
مرمر

Nov 14, 2008

رحـيـل إيـمـانـى




أدركت "أنا" .... و هنا ينتهى دور "انا" فى الجمله عند توضيح ضمير أدركت ، فهو ضمير المتكلم و هو أنا و ليس ضميرها هى .... و حين يأخذ الضمير اشكالاً كتير فهذا يُعد اتفاق غير مُـعلن و غير مُـدرَك بين بنى البشر حول تعدد الإيمانات ، ، .... "الإيمانات" هنا تائهه حائرة دائرة ثائرة تبحث عن قارب خشبى تستقر به و تظل تناضل و تجاهد فى سبيل البحر و البر و السماء حتى مطلع الفجر ،
أو تبحث عن حله تيفال كبيره مليئة بالماء المخلوط بالبهارات و التوابل فى انتظار المرقه ، و بعد عشرين دقيقه ستينية الثوانى سوف نحصل على الإيمانات المسلوقه مع شوربة الإيمانات المتبله .. هذا الطبق صحى لأنه خالى من اى دهون و متع زائفه .. هذا الطبق مناسب لكافة مرضى الهطل الإجتماعى و التابوهات و الغباء المستفحل اجتماعيا و اسريا .. هذا الطبق مفيد لأنه ليس فقط خالى من الحياه بل يقلل الشعور بها أحيانا .. و هناك وصفات أخرى لتناول "الإيمانات" ..
كم من الجرائم ترتكب بإسمك ايتها الإيمانات ..

احزم أمتعتى --لا لأجعلها ترقص-- بل لأرحل سريعا و بشكل مفاجئ و ضرورى الى سكن آخر "سبحان الصدفه" .. سأرحل لأن
كان من المفترض ان أكتب مبرر لرحيلى فى السطر السابق و لكن لم استطع كتابة المبرر و لذلك تركت السطر مفتوح و لم أضع نقطه او فصله لإعلان نهاية الجمله
اشيائى كثيره و غير ضروريه
مكتب
مكتبه
سرير
كتب الكليه
صور
بعض البتاعات السيوى المصنوعه من الخوص الملون تصلح لجميع الأغراض حتىنفاذ الكميه
صندوقى الخشبى
آلات موسيقيه
بعض العطايا من ست الدار .. أمى ،، مناصفة مع الإبنه المطيعه الوحيده .. أختى

لن أحصل على كمبيوترى اللى كان فاضل له شويه و يطلع له ديل
لن أحصل عليه لأسباب غلاويه جامعه مانعه ضايعه
يود أبى أن يتعلم استخدام شبكة المعلومات العنكبوتيه .. بس ف السن الخطره دى ممكن يمشى ف طريق الضياع .. يعاكس بنات و يتفرج على المواقع الإباحيه .. و ينجس العتبه الطاهره
اللى هيه الكيبورد


نرجع لأدركت أنا

أدركت أنا ان

عفوا .. انا لم ادرك شىء بعد و لن استطيع استكمال البوست الآن ، ربما اعاود حين ادرك
.
لقد وضعت نقطة اعلان انتهاء الجمله فى السطر التالى لأنها مش بتيجى ف مكانها الصحيح
.